Zeedel 2024
die verruggte Rhy-Waggis 2015
"Fyyr und Flamme, im Europa Park brennts hald amme."
Hösch Digge kunnsch au mit,
In Europa Park - das wär dr Hit.
Knappi anderthalb Stund hänn mir bis deert ahne,
Und freye ys scho sehr uff d Bahne.
Mir sy Fyyr und Flamme kennes kuum erwarte,
Mit dr Silver Star duure z starte,
Doch nochere Stund ahstoh - das isch s bescht,
Haissts: "haben sie bitzli Geduld wir stecken grad fescht",
Jänu so denn denn ischs hald so,
Mir blybe no zwai Stund in dr Schlange stoh,
Denn dängge mir s miechi Spass,
Uff dr Atlantica wirdsch e bitzli nass,
Kuum stehn mir in dr Schlange,
ischs wieder nit lang gange,
Do haisst: " diese Info tut uns leid,
Auch hier stecken wir fescht - wenns weitergeht geben wir bescheid".
Noch däm ganze warte rauchsch no gärn e Stumpe,
Wettsch luege wie sy us 20 Meter ins Wasser gumpe,
Kuum gumpt ain gumpt au scho dr ander,
Und bevor sy nass sy gheit s Wasserbeggi usenander.
E gmiedliggi Bootsfahrt das wär jetzt scheen,
Dr Grund wyso mir jetzt uff Batavia geehn,
Doch kuum dien mir im Böötli sitze,
Mien mir hueschte und dien schwitze,
S Schiffli hett Fyyr gfange und das isch s Schlimme,
Jetzt gits nur no ains: sälber schwimme!
Guet geehn mir halt e Hyysli wyter,
Doch au die Entschaidig isch bitz schiter,
Bym ahstoh kunnt e Durchsag: " sie müssen bitz präsieren,
Wir müssen grad den Park evakuieren,
Die Tirolerwildwasserbahn es ischt ein Wahn,
Wird grad zur Lieschtaler Chienbesenbahn"!
Drumm hätte mir fir eyre näggsti Bsuech e Bitt:,
Nämmet doch e Fyyrlöscher mit!
Vogese Rueche Basel
"150 Joor Waggis – d Legände läbt"
Syt 150 Joor genau,
Freyt sich jedes Kind und jedi Frau,
Iber d Waggis wo,
Am Cortege dien uff de Wääge stoh,
Syt 150 Joor jetzt scho,
Dien d Binggis Dääfeli bykoh,
D Miggeli e Röösli,
E Hampfle Räppli und Mimösli,
D Männer hingäge die sy froh,
Allewyl e Schnäpsli z bykoh.
Syt 150 Joor sy mir im Gscheh,
Syt 150 Joor duets immer glain Ändrige geh,
Vomne glaine Nääsli zemne grosse Zingge,
Vo schlichte Äugli ze settige wo Blingge,
Friehner no mitem Laiterkarre,
Und Ochse wo dy dur dr Cortege fahre,
Hytt mit riese Wääge und no gressere Traggdore,
Isch die alti Zyt scho fascht verlore.
Friehner hesch no intrigiert und Sprichli gmacht,
Räppli gmschisse und denn zämme glacht,
Hytt ischs bitz anderscht uffem Waage,
Darfsch jo nymm alles sage,
Muesch uffpasse ohjee,
Was darfsch no abem Waage geh,
Ain isch Vegan – firsst also kai Geladine,
Wills nit fairtrade isch foht e andere ah gryyne.
Sälle vertrait kai gluteen,
Diese hett mit laktose e problem,
Muesch dy also froge persee,
Was darfsch no abem waage geh?
Saisch ainere, kumm mol do ahne schätzeli,
Haut die dir gratt uffs dätzeli,
Was fallt ihne yh, wie kenne sys wooge,
Das haisst nit kumm, nai sy sotte frooge,
Wurde sy welle schäll do ahne koh,
Mit du mien sy denn au nit ahfoh,
Mir kenne uns jo nit, mir platzt dr krage,
Drumm sotte sy SIE zu mir sage.
Allgemain sygs e beläschtigung,
Drum erwart y jetzt e entschuldigung,
Ihr mergget die hett doch e schyybe,
Und ych als waggis muess drunder lyyde.
Mir stöhn do dryber – mir sy drumm besträbt,
Ass d Legände nomol 150 Jöörli läbt!
Guggemuusig Rhy-Pirate
Sy 40 Joor herrscht e Gschnurr,
Dr ganzi Daag und au d Nacht dur,
Das Gschnurr das wird ys langsam z vyyl,
Denn syt 11 Joor schurrt ununterbroche dr vo Wattewyl.
Mit dem Sujet wänn mir gratuliere,
Und eych sage: mir wänn eych nit verliere,
Ihr hänn e guets Format und au no Stiil,
S Stephi Schluchter, dr Kevin Vogel und hal dr Wattewyl.
D Morgeshow die gfallt uns Pirate,
Perfäggter kasch dr Daag nit starte,
Usser s schnurrt do unsre Silberpfyyl,
(Ihr ahnet d Pointe) dr Dani vo Wattewyl.
Am Fiirobe im Radio verzellt dr Bachmaa sy Saich,
S glyche macht au d Bettina Speich,
Und s scheene drah isch allewyyl,
Am Oobe kai vo Wattewyl.
40 Joor Basilisk mir winsche s bescht,
Und hoffe uff e Yladig ans Geburtsdaagsfescht,
Machet wyter so und löhnd alles bym alte,
Und wenn s sy muess, deerfet ihr au dr Dani bhalte.
Rhyserva Alti Garde
"Mir flaniere und bloggiere!"
Wettsch goh flaniere in unsere Stadt,
Oder bloggiere fändsch au no glatt,
Doch bevor des kasch wooge,
Muesch dy zerscht no frooge,
Jä nundefahne,
Wo kasch no ahne.
Es goht jo scho los,
In dr Freyestrooss,
Deert bloggiert ai Baustell die näggscht,
Und s goht grad wyter im Täggscht,
Nämmli am Märtplatz unde,
Hänn mir no e wytri Blockade gfunde,
Im Rohthuus hinter dr Fassade,
Hett jede wie dr näggscht die greesser Blockade.
Flaniersch wyter richtig Rhy,
Dänggsch das kah jo nit sy,
Demonstrante glääbe uff dr Mittlerebrugg,
Und kai Drämmli fahrt me hie und zrugg.
Dr Grund fir was die demonstriere,
Ass me kaini Demos me darf durefiehre.
Also guet dä Grund isch zwor nit dumm,
Mir draihe aber trotzdem um.
Via Fischmärt flaniere mir am Gifthüttli verby,
Und dängge das darfs nit sy,
Jetzt ischs Hotel Basel zue,
Wo schlooft denn an dr Fasnacht dr Heiri mit syner Kueh?
D Köch dien jetzt wo andersch ihr Schnitzel paniere,
Und mir mien e Huus wyter flaniere.
Via Rümmelin und Gläbbergässli,
Sy mir am Barfi und sehn scho s näggst Gspässli,
Au s Kohlmanns macht noch dr Fasnacht dicht,
So heere mirs ämmel im TeleBasel Bricht,
Guet wenn mir scho bym Thema sy,
Blyybe mir doch grad derby,
Mir finde s TeleBasel isch au bitz bloggiert,
Ab däm Sänder sy mir fang schoggiert,
Kuum gwöhnsch dy ans neye Format,
Hänn sy scho e neys barad,
Nur epis erinneret ys no an e Sänder mit Styyl,
D Plauderdäsche vo Wattewyl.
S Programm vo däm Sänder duet aim weh,
Allewyyl nur d Blockade vom FCB,
Vom Morge bis Zoobe zaige sy unginiert,
Wie dr FCB gmiedligg yber s Fäld flaniert.
Bym lääse vo dem Zeedel fallt dir ùff,
Unsri Stadt isch s rainschti Blockadebùff.
Drumm liebe mir d Fasnacht mit unsre Frinde,
Will vyyli Blockade denn verschwinde,
Wenn alli Fasnächtler drey Dääg dur d Stroosse schlyyche,
Wänn doch aigendligg alli s glyyche,
Drey Dääg alles vergässe und frey könne sy,
Ob ùffem Seibi, Minschter oder am Rhy,
Ob by dr Kasärne, by dr Mäss oder ùff dr Wettstaibrùgg,
S wänn alli d Zytte ohni Blockade zrùgg!