Zeedel 2023

die verruggte Rhy-Waggis 2015

"Mir hänn Entwiggliggshilf glaischtet"

Im Septämber vor ai – zwai Joor,

Hänn mir doch, s isch wohr,

Noch de Corona-Fasnachte ains und zwai,

Yhglade zer Summerfasnacht in unsem Cliquedyhai.

Zwar ohni Umzug und au ohni Räppli,

Ohni FAKO und ohni Käthi in Adilette-Schläppli,

Wohrschyyns – s isch nit yberdryybe,

Isch sy denn scho im Lift stegge blyybe.

S hett nit vyyl gfhält fir e richtigi Fasnacht an däm Oobe,

S isch gsoffe worde im Goschdym und mit Schwoobe.

Schwoobe? Jä dasch scho rächt,

7 Stund isch dä gfahre – do wird aim fascht no schlächt.

Mit de Öv isch er ze uns gfahre,

Ohni mieh und Köschte z spaare.

Er fänd das cool s haut ihn us de Fuege,

Wir machen das jetzt auch kommt koh luege.

So sy mir fir d Summerfasnacht bekannt,

Das sogar jetzt au im Schwoobeland.

Im letschte Summer sy mir mitem Karre,

8 Stund uff Meerane gfahre,

Mit Goschdym, Larve, allem drumm und drah,

Nur an Stell vom Waage hänn mir e Ladäärne gha.

So waiss jetzt jedes dütsche Dotteli,

Was sy Dääfeli, was sy Zoggeli,

Fraue bykömme Röösli,

E Hampfle Räppli und e Mimösli.

Mir hänn Entwiggliggshilf glaischtet und dasch toll,

Denn die Dütsche sy jetzt unsi Frinde und kemme jedes Moll.

Vogese Rueche Basel

"Mir schwinge mit!"

Mir schwinge mit – styyge zämme in d Hoose,

Doch nit nur am ESAF – jä jetzt muesch loose,

Vor drey Joor hetts ghaisse: „Duet ys laid,

S isch umme und verby – alles abgsait!

S gitt kai Fasnacht drumm die Bitt,

Haltet eych drah und schwinget mit!“

So hänn mirs gmacht, hänn ys drah ghalte,

Hänn ys wie nit ganz bache verhalte,

Händli wäsche nit vergässe:

am Morge, z’Oobe, vor und nonem Ässe.

Desinfizieret alles was es gitt,

Zieh dr Mundschutz ah und schwing mit.

Allewyl hänn mir druff gwartet,

Bis wieder e Mediekonferänz startet,

Zwische hoffe und au bange,

Hett mängge s Spinne ahgfange,

Doch dasch egal – oder nit?

Hauptsach s schwinge alli mit!

Corona do und au deert,

D Wäld isch langsam gsteert,

Die letschti Generation duets au yberdryybe,

Glääbe sich uffe Boode – die hänn doch e Schyybe.

Sy schreye dy ah mit dr Bitt:

Mach d Auge uff und schwing mit!

Am ESAF putzt sich jede use,

Jede zaigt sich im Sennehemmli und dr Schwingerbluuse,

So kunnt alles was Rang und Name hett uff Prattele,

Sogar d Beatrice Egli die blondi Dattele,

So au zwai Flitzer – was es nit alles gitt,

S Beatrice hett gsunge – d Flitzer schwinge mit.

Im Facebock und im Instagram postet jedes Dotteli,

Vo sich sälber doofi Fotteli,

Im Tiktok s isch doch glar,

Macht sich per Video jede zem Narr,

Obs Sinn macht oder nit,

Isch doch glyych – hauptsach s schwingt jede mit!

E Jeede dänggt es miessi sy,

Und hänggt yberall sy Schnabel dry,

Me schurrt und schurrt was hesch was gisch,

Ob de druss kunnsch oder e Nichtwisser bisch,

Hauptsach s isch gschnurrt worde - ob d Wohret oder Shit,

Schyssegal – me schwingt halt mit!

Hesch de Zeedel begriffe oder nit,

Ich doch Wurscht – de schwingsch jo mit,

Mach doch nit jede Schyssdrägg mit,

Entschaid sälber ob de mitschwingsch oder nit!

Nit by jedem Saich uff Ärde,

Muess au mitgschwunge wärde.  

Guggemuusig Rhy-Pirate Basel

"S Theater gheit ins Wasser"

Au mir geehn ins Theater und findes guet,

Vor de Schauspieler ziehn mir dr Huet,

Die Scheeni und s Biest dien sy spiele,

Dasch nur ai Produggtion vo vyyle,

Doch by dr näggschte Produggtion allem ah,

Mien mir derfir e Badglaid ha.

Vor uns seglet – mir hänn alles im Griff,

Wie allewyyl unser Pirateschiff,

Hindedryy laufe d Biester in Schaare,

Jä die wänn au uff dem Schiffli faahre,

Au d Bell im gääle Glaid – s isch prekäär,

Fahrt glyy uff de Theatergwässer hie und här.

An Stell vom Drummeli oder em gstieflete Kater,

Sehsch neyerdings im Musical Theater,

Dr Itsy Bitsy Teenie Weenie,

Musical-Theater-Bikini,

S duet alles im neye Gwändli glänze,

An Stell vo Ooberoobe – blutti Ränze.

Mir finde das e Schnapsidee,

Mir leehn ys das nit loh neh,

Die Scheeni und s Biest geehn mir gärn goh luege,

Die Umfunggtionierig haut ys us de Fuege,

Drumm sott uff de Stimmzeedel stoh vo uns alle,

Die Abstimmig wird ins Wasser falle.

Alternativ kennt me jo probiere,

E Bihni z mittzt im Schwimmbeggi montiere,

An stell vo de Stiehl – mir hoffe s goht,

Hogge alli imne Gummiboot,

Und so hätt au – s kunnt au so in dr Zyttig,

Schwanesee e ganz neyi Bedyttig.